同系馬與鄭俊偉有緣　精算奕然操好至出 22/10/2025 今季兵力增加唔少嘅鄭俊偉，開鑼日頭威頭勢憑「讓愛高飛」及「桃花多」起孖，以為有個好開始，點知突然守齋10期，直到啱啱禮拜日嘅沙田賽事，先靠「精算特殊」打開缺口，亦贏到佢首匹從容天鵬馬房接手嘅賽駒，唯一可惜嘅係同日「團結勇士」同埋「時尚歡欣」未能幫米高哥再添進帳。 「精算奕然」9月中勝出田草800米大閘。 聽「精算」系話事人龐維寧講，原來佢唔係首次同鄭俊偉合作，事關喺14年前曾將「精算攻略」擺喺鄭廐，可惜跑咗4場輸晒，而呢匹「精算特殊」季內兩戰1冠1殿，龐生都話鄭俊偉將愛駒保養得好好，臨場見到毛色好油潤，結果順利贏馬。除咗「精算特殊」，龐生亦將精算團體另一匹新馬「精算奕然」交畀米高哥訓練，此駒今晚出戰第1場四班1000米，隨時一鳴驚人，嚟一口同主馬跨日孖寶。 馬主龐維寧、鄭俊偉 龐維寧就話「精算奕然」上季至今都試咗4課大閘先上陣，今季不論試田草抑或泥地閘走勢都唔差，狀態佢都算滿意，當然初出跑谷草兼且係夜賽環境，可能比較陌生，但佢哋一向有鬥志，交由周俊樂操刀，睇吓能否首戰即交出好成績？