遨遊氣泡馬會盃配潘頓 01/11/2025 應屆香港三冠馬王「遨遊氣泡」，剛戰復出跑1600米G2沙田錦標，改用潘明輝掛帥，結果孭134磅以第12名過終點，表現平平，亦令人猜測究竟年尾會否衞冕香港一哩錦標，抑或會增程跑2000米。若然增程出擊，上季為此駒贏咗4場G1嘅麥道朗，就未能效力，因為佢亦已落實夥拍前馬王「浪漫勇士」出戰馬會盃同埋稍後嘅G1香港盃。 潘頓 對於「遨遊氣泡」往後部署，姚本輝終於有定案，下仗將安排呢匹三冠馬王出戰途程2000米嘅G2馬會盃，兼且重配潘頓，練者透露隨住馬匹年紀漸長，相信2000米較一哩更合其發揮，亦相信經過上仗熱身後，馬兒表現會有大幅進步，而改用潘頓就屬馬主意願。自從潘頓前季策騎「遨遊氣泡」遠征日本安田紀念賽無功而還後，就未有機會再策騎此駒，潘頓喺前季嘅香港金盃，夥拍「遨遊氣泡」僅以頸位之微不敵「浪漫勇士」，如今此兩駒有機會喺馬會盃再碰頭，肯定非常精彩。另外，潘頓早前已過檔操呂健威馬房嘅應屆打吡冠軍「百賀飛駒」，原來此駒下仗將會角逐1600米G2馬會一哩錦標。 「浪漫勇士」昨日出試1200米泥閘由布文勝出。布文表示，「浪漫勇士」今課閘感覺更斂口和放鬆，因為牠在9月27日試谷閘，當時充滿新鮮感，跑來較急，但隨住試多兩課閘，昨日走勢明顯放鬆且願意留力，表現愈來愈好。