金發盛世加罩出擊 02/11/2025 挾南非冠軍騎師盛名來港發展嘅董明朗，首季來港客串就有21場頭馬，即使唔算突出，都叫做不過不失，可惜上季出賽次數少一截，最終只得12W，成績大幅倒退。到咗今季，都預咗係要捱打，但估唔到馬季都過咗兩個月，佢仲未開齋，更慘嘅係上陣次數比金誠剛及潘大衞兩位英國好手仲要少，遲吓杜苑欣、麥道朗、紀仁安嚟埋香港，情況不堪想像。 「金發盛世」上季曾配董明朗勝出谷草。 不過，董明朗仲有今季來港開倉嘅鄉里桂福特撐吓，今日跑馬地賽事兩匹坐騎悉數來自桂廐，分別係「龍船快」及「金發盛世」，相信董明朗都好想贏馬開齋，報答練者嘅信任同支持。 董明朗 第8場三班1200米嘅「金發盛世」，上季尾喺呂健威馬房時已經由董明朗執韁，兼且贏咗場三班同程，人馬算合拍，難怪今季加盟桂廐首戰，桂福特都係搵董明朗幫手，同時卻除咗眼罩上陣，結果表現平平只得第7名，復課後除咗繼續由騎者親操，亦經常用馬匹跑步機上斜步行，但更重要係今次用番贏馬配備，重戴眼罩上陣，配合3檔好位，應該係董明朗開齋黃金機會。 桂福特