廖康銘14連勝摘星 02/11/2025 廖康銘今季真係贏到唔識停，啱啱禮拜四沙田全泥宴又輕輕鬆鬆起孖，尾場更憑「新意馬」同埋「智跑得」包辦馬房Q，旺氣逼人，話咁快已經有20W喺手，差唔多係佢上季一半嘅頭馬數目，即使講爭冠可能仲係言之尚早，但肯定係季初最炙手可熱嘅馬房啦。 廖康銘 講起練馬師嘅連勝紀錄，就係伍鵬志前季造出嘅連贏15日，同樣都係嗰季季初發生，廖康銘依家連贏13期，絕對有機會挑戰呢個紀錄，而今日嘅跑馬地日賽，可能係最大嘅阻礙，事關佢喺對上兩季都冇試過喺谷草日賽建功，今日大堆頭派9駒上陣，擺明求突破，其中第5場四班1200米香港鄉村俱樂部盃嘅「星之願」就值得留意。 呢匹5歲澳洲PPG來港後跑咗10次仲未贏，但有兩個亞軍都係喺谷草1200米取得，擺明擅跑此程，剛戰抽10檔起步索性留前鬥後，最終只係落後半馬位畀「東來欣賞」得第2名，今次原本再度碰頭，但「東來欣賞」排位後已經退出，難得宿敵都冇埋，「星之願」即使再抽10檔，仍大有機會補中開齋啦。