杜苑欣：唔排除長駐香港 05/11/2025 英國著名女騎師杜苑欣會喺今晚跑馬地夜賽亮相，客串7個星期至12月23日。騎者昨晨先到沙田馬場出席晨操及試閘，並由經理人陪同下喺烽火台「洗樓」，同眾練馬師打招呼。 杜苑欣昨朝首次參加沙田晨課。 杜苑欣約5時先替第2場「有心意」及第5場「自動自覺」內圈踱步，之後再試第3場「祥龍駒」及第4場「閃電箭」。她又替文家良馬房的「雙贏」試第3組泥閘，跑第3名過終點。 杜苑欣近3年嘅冬天都喺日本客串，騎者表示自己一直都想嚟香港客串，所以馬會一邀請就應承，而今次亦係佢首次參與沙田馬場嘅晨操，她說：「因周一晨課時我仍未到達香港，錯過咗部分賽駒最後試跑，不過部分練馬師都想我喺賽前了解出賽馬匹性格，所以我今（昨）晨都喺內圈操咗4駒，感覺良好。」 講到今次客串嘅目標，杜苑欣話都知道喺香港贏一場頭馬係一件好困難嘅事，所以都係做好自己，盡力爭取更多頭馬，之後唔排除會長駐，不過暫時一切都未有定案。另外，杜苑欣認為今日尾場嘅「樂勝天下」，係最好機會嘅一匹坐騎。 杜苑欣亦提到，香港女見習騎師黃寶妮嘅進步大家都有目共睹，好開心Britney最近可以獲批喺跑馬地馬場上陣，加上早前佢亦捧咗盃，希望黃寶妮嘅成功，同埋自己到來，可以吸引更多女騎師來港策騎。