晒冷玩水中步行 08/11/2025 馬會今年斥巨資喺沙田馬房、奧運馬房引入馬匹跑步機，從化亦有增設馬匹水中步行機。現時喺練馬師榜排榜首嘅廖康銘，就非常鍾意安排馬匹用呢啲新設施，當中周日跑第5場的「晒冷」，上場跑完上從化後，差唔多日日都有用馬匹水中步行機保持運動量。 「晒冷」 對於水中步行機，廖康銘就話可以想像人喺泳池一樣，有水壓推動下前行，對馬匹嚟講係一個比較輕鬆嘅訓練方法，既可以提升狀態，又能夠增加肌肉強度。「晒冷」近兩仗都跑入位置，今次繼續跑1200米，馬房志切要交代。 嘉應高昇今朝快跳 另外，香港馬王「嘉應高昇」昨晨約6時45分由潘頓策騎出大圈操練，不過就無進行到快跳，只係喺外圍快踱一圈。希斯就話本身係打算拍跳，不過晨操落雨不斷，泥地跑道無喺6時15分閂圈耙地，為咗保護「嘉應高昇」隻腳，最後決定快踱一圈。練者續指，佢話睇咗未來幾日嘅天氣報告，仍然好大機會落雨，晨課未必會耙地，所以今日會安排「嘉應高昇」早啲出大圈做快跳工夫。