陶夢成真力撐石哥 09/11/2025 徐雨石近年成績都係處於下游，因此養馬量亦比較少，但上季反彈有18場頭馬後，令到馬房兵力總算有所增加，目前都有35駒，當中更有年輕馬主陶樺瑋全力支持，除咗佢有份嘅巨款團體嘅「手到齊來」擺喺徐廐，佢另外有份嘅團體馬「艾彼奧」同埋今年來港嘅L布自購馬「飛馬座」都係交畀石哥訓練。至於今日首度登場，角逐第5場三班1200米嘅「陶夢成真」，就係陶生同埋老婆陳綺翹夾份擁有，相信石哥都好想幫呢位咁支持自己嘅馬主一出即勝啦！ 徐雨石 講起陶樺瑋，上個月30日徐雨石65歲牛一，陶生都有買蛋糕同石哥慶祝，結果當晚陶生老友李偉健博士名下嘅「星火燎原」建功，而今日輪到陶生嘅「陶夢成真」、團體馬「艾彼奧」再加埋「星火燎原」一齊出擊，擺明有料到。 陶夢成真（近鏡）最近贏谷閘好吸引。 睇番「陶夢成真」來港前喺澳洲一出即勝，輕勝對手3個幾馬位，今次試咗3課大閘先上陣，難得見到呢匹4歲馬幾次展現追勁，走勢唔錯，今次孭輕磅跑田草1200米，不能忽視。