來港即操浪漫勇士 麥道朗篤定冧莊世一 12/11/2025 今晚谷草展開客串期嘅麥道朗，昨晨出席晨操，先替「浪漫勇士」喺草地同廐侶兼同主馬「浪漫戰神」拍跳，之後再替賀賢旗下嘅「福聚」喺泥地快跳，之後亦替沈廐「長勝金剛」及黎廐「豐盛」試閘。 麥道朗 麥道朗話因為經過長時間征戰，年尾都需要多啲時間休息下，所以今次客串期比以往短（至12月20日）。而麥道朗目前喺全球最佳騎師榜以184分高踞榜首，領先次席嘅巴米高64分，篤定成功衞冕兼第3次奪得呢項殊榮，麥道朗就將功勞歸於「浪漫勇士」、「遨遊氣泡」及「精緻之道」身上。 「浪漫勇士」昨由麥道朗試草地。 而麥道朗嚟緊喺11月23日除咗會喺二級賽馬會盃夥拍「浪漫勇士」出戰外，佢喺兩場G2將會分別策騎「舉步生風」及「錶之銀河」出戰馬會短途錦標及馬會一哩錦標。 麥道朗策騎「浪漫勇士」操練，沈集成當然非常緊張，先行去烽火台前嘅草地睇兩駒，跟住就即刻行返去接馬。「浪漫勇士」今季初完成中東遠征之旅後，回港發現左前球節受傷並接受手術，到9月初先做番快工夫，麥道朗昨晨跳完之後大讚馬匹狀態，他說：「『浪漫勇士』同受傷之前無任何分別，沈集成將此駒保養得好好。」而麥道朗亦指自己好掛住「浪漫勇士」，回港第一匹就操此駒，絕對係一個好開始，就連老婆同囡囡都好興奮。