錶之星河要贏馬幫補 15/11/2025 啱啱喺周中舉行嘅2025新西蘭兩歲馬拍賣會，唔少香港練馬師同馬主都南下揀蟀，當中最瘋狂嘅就係「錶」系馬主楊建民，一口氣買咗16匹兩歲馬，加埋使咗357萬紐元（約1,570萬港元），當中最貴嗰匹係82.5萬紐元（約360萬港元），父線出自「摘星勇驥」嘅兩歲馬，同時亦係「知道長勝」嘅同母細佬。 錶之星河剛戰縮回1200米重開勝門。 其實「錶」系嘅楊建民近年都鍾意係新西蘭兩歲馬拍賣會瘋狂入貨，今年只係延續呢個傳統，既然買咗咁多新血，梗係想贏馬幫補吓，而喺今日沙田賽事，「錶」系有「錶之星球」、「手錶之星」同埋「錶之星河」三路興兵，「錶之星河」出戰第7場二班1200米草地，六福珠寶盃，絕對值得重視。「錶之星河」上季以3歲之齡直落贏咗3場田草1400米，只係季尾輸畀「同樣美麗」，唔少人都覺得「錶之星河」今季可以進軍4歲馬經典賽事系列，點知今季復出跑1400米三甲不入，剛戰縮程跑田草1200米順利補中，賽後文家良話其實係潘頓建議隻馬跑番短途，依家證明判斷正確，今次升上二班再跑同程孭少10磅，睇吓能否順利連捷啦？