回勇迎戰三班　潘頓呢鋪桃花開 23/11/2025 冠軍騎師潘頓早輪氣勢強勁，點知啱啱周三谷戰只得4匹坐騎，最終全晚只得1個季軍，亦令佢之前連贏15期嘅強勢斷纜，非常可惜。不過，今次回師沙田大賽日，相信又係潘頓大開殺戒嘅時候，除咗有馬王「嘉應高昇」復出角逐二級賽馬會短途錦標外，其餘坐騎都分量十足，其中由佢重新接手嘅「桃花開」，更加值得留意。 潘頓 潘頓一向同「桃花」系馬主曾祥顯關係唔錯，今季曾生嘅五班馬「桃花多」跑3場都係由佢執韁，拎到1冠1亞，就連曾生有份嘅24/25鄭俊偉練馬師賽馬團體馬「桃花俊」，啱啱禮拜二在港首課試閘，亦由潘頓親自考驗，擺明重視。至於今次主角，曾生有份嘅桃花團體賽駒「桃花開」，在港首季服役已經喺潘頓胯下贏三班田草1600米，上季以為係潘頓跑4歲大賽棋子，可惜進度同埋適應都略遜預期，跑咗6場只得1季。 告東尼 不過，經過更長時間適應水土後，東廐「桃花開」今季復出跑二班田草1600米，卻能後上跑第3名，走勢不差，難怪復課試泥閘立即由潘頓過檔，今次難得可以跑85分上限嘅三班賽，有望再次建功。 「桃花開」上仗復出路短亦得季軍。