廖康銘祝願爭100W 23/11/2025 踏入來港開倉第3季，廖康銘真係盡顯功架，早輪曾經試過連贏13日，啱啱禮拜三谷戰憑「勁好運」食尾胡，季內頭馬增至22場，排喺練馬師榜首位，領先第2位嘅希斯4W，認真犀利。唔講唔知，原來廖康銘喺香港已經累積咗97場頭馬，只差3場就夠100大關，而睇廖廐今日陣容，有鎮倉寶「祝願」負責把關，出戰G2馬會一哩錦標，絕對有權完成目標。 「祝願」上仗輕取沙田錦標。 廖康銘雖然只派7駒上陣，但第1場四班1200米嘅初出馬「明亮光輝」，來港未夠半年，4歲澳洲PPG適應算快，上月起試咗3課大閘，都喺前3名過終點，走勢吸引，今次抽4檔好位，梗係有望一鳴驚人。至於第5場嘅「白鷺金剛」上季兩戰都追唔切跑第2名，今季復出再用霍宏聲得季軍，結果上仗增程跑1400米改用潘頓，抽14檔都可以輕鬆贏兩個馬位，賽後加10分升上三班，今次孭少11磅抽2檔，連捷機會高唱入雲。嚟到守尾門嘅「祝願」，今季戰鬥力更進一步，已經贏咗兩場分級賽，今次跑G2連「遨遊氣泡」都轉去跑2000米，只係遇上大部分上次輸畀佢嘅對手，睇嚟廖康銘第100W，極有可能係「祝願」嘞！