希斯獲支持再放箭 23/11/2025 希斯呢輪手風都唔錯，單計今個月已經拎咗5場頭馬，兼且兩度起孖，包括啱啱禮拜三憑「建測羣英」及「友愛心得」建功。嚟到今日沙田賽事，馬王「嘉應高昇」跑G2馬會短途錦標，希斯固然係志在必得，但相信佢亦對首度登場嘅4歲自購馬「威利金箭」有所期待。 「威利金箭」上月尾贏泥閘吸引。 「威利金箭」馬主羅琪茵今季決定再次支持希斯，除咗將呢匹潛質優厚嘅4歲馬交畀希斯訓練，早前亦將「直線力山」轉返希廐，今日轉倉初出跑2000米G2馬會盃。既然再次獲得大馬主器重，希斯梗係要做齣好戲，而呢匹「威利金箭」喺澳洲贏過三級賽，並於G1考菲爾德堅尼得第5名，來頭唔簡單，因此評80分插班。自8月開操後，希斯安掛此駒試咗4課大閘，最近一課用羊毛面箍更加擺前勝出，走勢強勁，今次亦用呢個配備跑三班田草1200米。始終羅琪茵名下嘅上季打吡冠軍「百賀飛駒」，月初拚至流鼻血兼心律不正常，相信要抖一段時間，睇吓羅女士嘅新寵「威利金箭」能否立刻接棒，今日順利一鳴驚人。