時尚風趣贏完再泥 30/11/2025 近年都要打護級戰嘅鄭俊偉，今季由於得到唔少容天鵬馬房舊部加盟，搖身一變成為大倉，馬房有57隻馬，自然唔使擔心兵源問題，依家亦有6場頭馬喺手。不過，自從月初喺谷草日賽憑「瑤瑤日上」建功後，米高哥已經連續7期無進帳，而喺今日沙田賽事，佢罕有大堆頭派8駒出擊，擺明有心打開缺口，而咁啱禮拜二就係佢64歲牛一，相信米高哥都想提早收到生日禮物。 鄭俊偉 睇番今日鄭廐馬陣容，真係非常強勁，除咗有「帥帥友福」搵到麥道朗掛帥，仲有「瑤瑤日上」及「時尚風趣」兩匹王牌馬挾新勝之勢而臨，擺明有計。其中「時尚風趣」今季由容廐轉投鄭廐後，10月初先喺三班谷草1200米跑咗1場，可惜只得第9名，剛戰突然轉跑毫無根據嘅泥地1200米，結果後上贏馬，爆出17倍冷W，米高哥就話自己研究過呢隻馬嘅血統同腳法後，覺得適合跑泥地，同埋覺得如果繼續跑草地，三班對手太強，同埋場地太硬，所以轉場一試，結果試出彩虹。 巴度 既然搵到泥地新出路，米高哥今次安排「時尚風趣」續配巴度再跑泥地1200米，即使抽12檔，只要交出上次嘅後勁，依然有權再下一城。 時尚風趣上仗初戰泥地即勝。