美麗星晨爭分跑大賽 30/11/2025 「美麗」系最近手風都唔錯，先後見到有「一世美麗」、「凝聚美麗」、「美麗邂逅」、「同樣美麗」同埋「美麗星晨」建功，後駒今日出戰第10場三班1600米草地，當然想再下一城。聽馬主郭浩泉（Patrick）講，呢匹3歲愛爾蘭自購馬，係佢哋今季最有期望嘅「美麗」賽駒，故此今季復出後頭兩仗都贏唔到，Patrick都話有少少失望，佢覺得最大原因可能係季初太快畀愛駒增程跑一哩，未算太適應到，因此表現一般，但剛戰檔位比較理想，終於贏馬補中。 告東尼 另外，Patrick亦提到「美麗星晨」始終係北半球馬，比較遲熟同要啲時間適應，只係告東尼一早喺試閘時已經話愛駒質素好，長遠目標當然係今季嘅4歲馬經典大賽系列，即使未必有2000米長力，仍會盡力一試。既然有咁大期望，今次「美麗星晨」再跑三班田草1600米，肯定不容有失，況且抽到上次贏馬嘅5檔，繼續由潘頓執韁，有望食多一次尾胡。 美麗星晨上仗勝出田草1600米。