好好戀愛情濃第2仗 03/12/2025 有啲馬名會令馬迷特別印象深刻，好似今晚第7場三班1000米嘅「好好戀愛」，雖然只係跑過一次，相信有唔少人都記得呢個馬名。而馬主廖文濠似乎特別鍾意呢個「戀」字，事關佢對上一匹名下馬「初戀」同埋自己有份嘅團體馬「戀愛狂」，都係用咗呢個字，廖生講當初都係想改啲令大眾有共鳴嘅馬名，之後佢啲馬都應該會繼續用「戀」字命名。 何澤堯 值得一提，廖文濠嘅「戀」系賽駒有個特色，就係嚟香港後第2次出賽例贏，之前嘅「初戀」同埋「戀愛狂」都係咁，今晚輪到「好好戀愛」在港第2次上陣，係咪可以維持呢個傳統呢？ 「好好戀愛」上仗初出熱身性質得第5名。 睇番呢匹3歲澳洲自購馬上仗初出跑三班田草1000米直路賽，結果以第5名衝線，落後「翠紅」3個馬位，後駒啱啱禮拜日再出喺二班賽事都入Q，證明水準唔差，而「好好戀愛」喺澳洲跑慣右轉900及1100米，今次轉場跑谷草1000米應該更合腳法，埋門同廐侶「銀刺勇士」拍跳走勢吸引，配何澤堯值得重視。