一世美麗未來可期 07/12/2025 蔡約翰今季比較慢熱，嚟到12月初仲係只得6W，但始終馬房兵力雄厚，質新子彈多，只要進度嚟到，就可以連珠炮發，攻勢隨時一浪接一浪。好似今日沙田賽事，無疑大賽前夕戲碼比較平淡，但蔡約翰就有挾新勝之勢而臨嘅「一世美麗」出戰第5場四班1400米草地，當然不能忽視。 麥道朗 「一世美麗」呢匹4歲新西蘭PPG今季出道，頭兩仗好似冇咩睇頭，但剛戰改用麥道朗跑田草1400米，臨場變成大熱門，最終順利以一馬位之先擊敗「文明福星」打開勝門，聽馬主一定美麗團體嘅成員郭少明講，「一世美麗」在港頭兩次出賽分別抽12、14檔，唔算太理想，加上用唔到合適嘅跑法，因此未能交出水準，剛戰就抽到3檔好位，兼且蔡約翰亦出盡法寶，幫愛駒加咗頭罩上陣，結果與鞍上人麥道朗一齊開齋，佢都好開心。郭生仲提到，「一世美麗」初出一役喺1200米跑第5名唔失禮，無疑長遠應該1600及1800米更合腳法，但依家仲喺四班，再跑1400米問題不大。