喜尊龍換人唔輸蝕 07/12/2025 貴為冠軍騎師嘅潘頓，話咁快今季已經有43場頭馬，但唔愁冇好坐騎嘅背後，有時都要面對魚與熊掌嘅選擇，好似今日第10場三班1400米草地，丁冠豪馬房鎮倉寶「小鳥天堂」同埋蘇偉賢訓練嘅「喜尊龍」，都係佢嘅坐騎，前駒今季搵佢接手跑咗兩場有1冠1季，而「喜尊龍」近5仗喺佢胯下拎到3冠1季，今次兩隻馬都要孭135磅，結果潘頓就揀咗騎「小鳥天堂」，反而放棄上仗贏馬嘅「喜尊龍」，係咪代表「喜尊龍」機會差一線呢？ 蘇偉賢 對「喜尊龍」馬主杜偉強嚟講，潘頓的確非常重要，事關愛駒3W都係由呢位冠軍騎師經手，杜生甚至覺得潘頓係愛駒唯一嘅騎師，可惜依家潘頓另有聘約，練馬師蘇偉賢亦做足功課，一早搵到全球最佳騎師麥道朗過檔試泥地1200米閘，結果後上衝贏遠征南韓贏馬嘅「自強不息」，證明人馬都算合拍，相信即使冇咗最佳拍檔，依然無損威力。 「喜尊龍」上仗由潘頓輕勝1400米。 另外，「喜尊龍」屬4歲馬，無疑目標係之後嘅4歲馬大賽，但杜偉強上次都講明，萬一愛駒唔使升班，仍傾向繼續跑1400米，所以今次再攻同程，仍有留意價值。