部署大賽日攞威 包裝戰將變招反撲 14/12/2025 啱啱禮拜三國際騎師錦標賽夜，呂健威炮製匹71倍巨型冷門「好實力」，應該搞到好多馬迷一地眼鏡碎。嚟到今日香港國際賽，威哥繼續強陣出擊，若能連場數胡，馬迷應該唔意外，事關喺舊年嘅香港國際賽日，呂廐雖然喺4場G1無收穫，但其餘6場本地賽事，先靠「開心樂園」、「包裝福星」及「開心寶寶」贏晒頭3場，然後仲有「包裝天將」食尾胡，全日食咗鋪大四喜，威風八面。 呂健威 到咗今日，呂健威除咗有「開心樂園」嘅同主馬「開心孖寶」首度登場，亦安排「包裝」系「包裝戰將」出戰第3場四班1200米，應該都係想幫「包裝」系重溫好夢啦！ 潘頓 4歲PPG「包裝戰將」喺9月尾初出即贏四班田草1200米，翌仗再出自然捧成大熱門，卻跑到三甲不入，賽後潘頓都解釋唔到隻馬點解表現咁差。復課後工夫正常，今次賽前試咗兩課大閘，嘗試教留住追，效果都唔錯，同時亦決定初次綁脷上陣，應該會有唔同效果，今仗重整旗鼓，配合埋3檔好位，有力取勝。 「包裝戰將」（左）前仗初出力壓「辣得準」贏田草1200米。