3匹巴閉爭住稱王 17/12/2025 如果係啲大馬主，好似郭少明嘅「美麗」系，又或者蕭百君同佢家人嘅紅黑兵團，甚至近年不斷擴充版圖嘅楊建文「錶」系賽駒，同日賽事有3至6隻馬上陣，並唔出奇。不過，以個人身份養馬嘅馬主，要一日派幾匹名下馬上陣，並唔係咁容易。不過，今晚跑馬地賽事，麥啟聰名下嘅「巴閉佬」、「巴閉哥」同埋「巴閉王」3駒分途出擊，唔通係有心揀今晚出擊，想度過巴閉一夜？ 呂健威 或者今晚3匹「巴閉」都唔係咩牌面馬，但第8場三班1000米嘅「巴閉王」，今季頭3仗喺田草表現平平，剛戰轉爭谷草最短途改由杜苑欣執韁，即使抽不利嘅10檔，竟然可以跑第4名輸個幾馬位，演出有進展，復課後立即用多咗跑步機進行上斜操練，今次原班人馬再跑谷草1000米，擺明求補中啦。 「巴閉王」埋門加強操練續有進步。 至於另一匹同陣營馬都係嚟自呂健威馬房第4場嘅「巴閉佬」，前仗喺田草1400米跑獲季軍，剛戰再跑此程抽外檔先冇嘢睇，今次轉場增程跑谷草1650米，或會帶來驚喜。