沈集成華麗再勝 連贏4期逼榜首 20/12/2025 最初以為今季冠軍練馬師之爭，應該係廖康銘、方嘉柏同埋希斯三頭馬車局面，但最近沈集成氣勢如虹，除咗鎮倉寶兼前香港馬王「浪漫勇士」4奪香港盃改寫歷史，計埋啱啱禮拜三憑「閃電星福」爆冷W，已經連續4期有進帳，目前累積23場頭馬，只係落後頭二名嘅廖康銘同方嘉柏1W。嚟到今日沙田賽事，沈廐派6駒上陣，表面上唔算太強，但「嘉嘉友福」同埋「華麗再勝」都係有近績支持之輩，隨時可助成哥連贏5期。 「華麗再勝」上仗泥地1200米後上輕勝。 其中角逐第9場二班1200米嘅「華麗再勝」，雖然上仗只係贏泥地同程，但部分蹄下敗將「笑傲江湖」及「天天同樂 」再度碰頭，當然唔使太擔心，況且其實「華麗再勝」開鑼日喺一班田草1200米特首盃，喺黃寶妮胯下只係輸畀馬王「嘉應高昇」3個幾馬位，表現唔太失禮，今次回師田草再用布文抽4檔，只係對住啲二班對手，再贏多場一啲都唔奇。 沈集成