從練500W在望 羅富全充滿活力 23/12/2025 唔經唔覺羅富全已經開倉第9季，今季全哥都炮製咗唔少冷品，好似「健康愉快」、「自動自覺」、「極上紗瓏」、「香港仔」同埋「凱旋升」都係逾10倍嘅頭馬，而上周六建功嘅「超勁赤兔」都有9.6倍，而後駒亦為佢帶嚟在港從練第498場勝仗，換言之佢仲差2場就達500W大關。而喺今晚2025年最後一次谷戰，羅富全大舉出擊出足9場，擺明想今晚贏夠500W，好似第2場四班1650米嘅「活力精神」，今季初復出初跑田草1400米以110倍大冷門後上跑第4名，證明有啲能力，然後上個月轉場初跑谷草1650米即得季軍，剛戰再跑同程抽11檔表現一般，今次由於巴度停賽，立即由潘頓接手，埋門親自快跳，戰意十足。 羅富全 至於第7場四班1200米嘅「駿馬之寶」，上季3歲無咩嘢睇，今季轉4歲進度理想，4戰此程兩次跑第2名，今次雖然好拍檔梁家俊停賽，改用華將一哥何澤堯問題不大，況且上仗將其擊敗嘅「團結戰靈」，今次孭多8磅兼抽不利嘅10檔，相信「駿馬之寶」已有權反先，為全哥帶嚟第500場頭馬。 「活力精神」近仗已在谷草一哩試準。