超拍檔似興馳千里 26/12/2025 聖誕節正日，昨朝以為騎練於平安夜開完Party唔會開工，點知估錯晒，晨課精彩鏡頭此起彼落，有啲騎師仲係專登到場操一件收工，值得加以注視。 「超拍檔」昨出試走勢輕鬆。 呂健威馬房全力備戰，「超拍檔」楊明綸、「雙星報喜」田泰安、「天將龍駒」巫顯東、「勁勇皇駒」何澤堯及「傑出雷霆」希威森，上述戰馬輪流出大圈快跳，威哥不停舉鏡打錶，忙到甩轆。 「超拍檔」出戰第1場四班1400米草地，初次上陣配阿綸搏殺，情況好似剛勝隻「興馳千里」。何澤堯7點半到場，獨操第7場四班1650米泥地件「勁勇皇駒」，上仗1200米追唔切跑第5名，增程出擊屬合理部署，鬥志無疑。 阿森好專注仄試第8場「傑出雷霆」，賽前3課大閘有唔錯走勢，鬥心強橫力度貫注，有權一出即勝。