極上紗瓏1400冇問題 27/12/2025 平時好少放假嘅羅富全，早排都趁聖誕節同家人去咗日本玩轉，但無影響馬房攻勢，啱啱禮拜二都有「活力精神」建功。而喺今日沙田賽事，全哥派出強陣，兩匹上仗初出即有表現嘅馬房團體馬「極上紗瓏」同埋「數字天文」分途出擊，前駒再跑只限3歲PPG及拍賣馬上陣嘅四班條件賽，有機會再下一城。 極上紗瓏上仗田草1200米一出即勝。 雖然「極上紗瓏」及「數字天文」都係羅富全馬房團體馬，但兩個團體嘅成員係唔同嘅，「極上紗瓏」其中一位馬主正正就係全哥嘅親家，囝囝羅峻濼嘅外母廖齡儀。之前廖齡儀自己名下嘅「俏芳華」累積6W兼做過跑馬地百萬挑戰盃冠軍，可惜其後嘅「妙芳華」及「耀芳華」都冇咩表現，「耀芳華」更未跑過就退役。不過，今次呢匹馬房團體馬「極上紗瓏」上仗一出即勝，展現不俗潛質，廖齡儀指愛駒係羅峻濼幫手引入，上次賽前試閘走勢唔錯，所以都有啲信心，同埋佢覺得愛駒可以跑長啲，所以今次增程跑1400米問題不大，如果可以克服加10磅，連捷機會樂觀。