羅富全繼續顯勝高昇 04/01/2026 有時啲嘢好奇怪，最近拎到在港500場頭馬嘅羅富全，開倉後一直都未有佢嘅馬房團體馬建功，估唔到喺2025年最後一次賽事，其中兩匹嘅羅富全練馬師團體馬「極上紗瓏」及「數字天文」雙雙建功，前駒更兩戰全勝，認真犀利，全哥亦坦言對呢兩匹質新馬都寄予厚望。不過，雖然兩駒都係羅廐團體馬，但其實入面啲成員都唔同嘅，而除咗「極上紗瓏」及「數字天文」，全哥目前仲有另一匹團體馬正在服役，就係24/25羅富全練馬師賽馬團體嘅「顯勝高昇」，相信全哥都好想贏埋呢匹。 羅富全 講開「顯勝高昇」，馬主團體其中一位成員就係「幸運有您」馬主梁文謙，即係同羅富全早已建立默契，而呢匹4歲澳洲自購馬喺當地1戰即勝就運港，上季尾跑咗場三班田草1200米只得第9名，到咗今季復出跑兩場都繼續冇表現，點知上仗落到四班跑田草1200米，兼且初戴交叉鼻箍上陣，結果取得第5名，首次拎到獎金，反映目前喺四班唔算太吃虧。雖然今次轉場初跑泥地短途，但早前此駒喺從化試泥閘一放到底，今次轉場唔似無的放矢，睇吓配上梁家俊能否贏埋呢匹團體馬？ 梁家俊