沙井之友周俊樂搏到盡 14/01/2026 早排靜咗幾期嘅周俊樂，上周三跑馬地賽事大發神威，憑「佳福駒」及「翠兒威威」起孖兼捧咗香港會盃，「翠兒威威」更係佢女友陳翠盈爸爸陳橋森嘅名下賽駒，可以幫到未來外父開齋捧盃，梗係意義重大。嚟到今晚跑馬地賽事，周同學唔止有機會再次為陳橋森建功，今次可能連女友陳翠盈都有份，事關Jerry再為陳橋森及陳翠盈有份嘅沙井之友團體賽駒「沙井之友」出戰今晚第9場三班1200米，如果連續兩次夜賽幫未來外父贏馬，都算一時佳話。 周俊樂 由沈集成訓練嘅4歲愛爾蘭自購馬「沙井之友」，上季尾初出角逐三班谷草1000米，後上如飛得殿軍，證明質素唔太差。不過，始終係北半球自購馬，今季初復出跑兩場表現一般，然後抖兩個月出戰谷草1200米，只不敵「川河動駒」得亞軍，今次兩匹馬即使再碰頭，但「沙井之友」由讓4磅變成受讓7磅，照計已經有着數，況且今次檔位亦比上仗好，有望反先對手兼開齋，值得重視。 沙井之友上仗谷草1200米後上亞軍。