俏眼光贏夠至加程 18/01/2026 蔡約翰踏入2026年非常強勢，頭3次賽事狂贏5W，認真犀利，但近兩期卻少少回落，無進帳之餘，啱啱禮拜三谷戰5匹參戰馬悉數不入三甲。不過，抖咗兩期嘅蔡約翰，今日沙田賽事擺明又再嚟料，派出14駒強陣出擊，擺到明要連場數胡，其中角逐第3場三班1000米十五運會香港獎牌運動員盃嘅「俏眼光」，應該係蔡廐主要嘅爭分籌碼。 「俏眼光」4戰直路賽2冠1亞。 今季出道嘅L布PPG「俏眼光」，無論係適應水土同埋進度都嚟得相當快，除咗初出一役跑第6名，近3仗喺1000米直路賽取得2冠1亞，上仗更克服孭135磅嘅難度後上掄元，姿態出色。 賽後馬主之一嘅潘子聰醫生講，佢覺得「俏眼光」適應咗前仗孭重磅後，剛戰終於發揮應有水準補中，但佢話肉眼睇愛駒狀態都係八成左右，只係馬匹心態夠成熟，結果再添勝仗。 途程方面，潘醫生覺得「俏眼光」升上三班後，跑長啲去到1200及1400米都得，但一切都交畀蔡約翰安排，而蔡神仙決定讓呢匹4歲馬再攻直路賽，自然有佢道理，今次更孭少12磅同對手唔太強，睇吓能否連捷兼捧盃？