嘉冠王呢鋪有聲氣 24/01/2026 昨晨為希斯馬房主要課期，12匹參賽戰駒分別安排出大細圈操練，更有幾駒由騎師親自操刀，練者在烽火台舉鏡逐隻睇，動態矚目。馬王「嘉應高昇」助手跳一段，練者照例在2樓睇足全程，再到機坪接馬，細心檢視一輪再用手探鼻，備戰準備萬無一失。 「嘉冠王」昨由霍宏聲出試活力十足。 第1場「嘉冠王」由霍宏聲跳一段，馬身輕盈彈力十足，埋門兩課大閘前列而返，狀態已復勇，聲仔首度主轡話唔定有新火花。第7場「心雄雄」楊明綸跳一段，新勝馬開咗竅咁款，自動搶住走仲弗過上次，連捷機高。第9場「飲杯」班德禮跳一段，騎者好心機，機坪踱步熱身都係自己騎埋，誠意滿分，上鋪跑G3氣管有血，復課後操練正常，今回師二班賽對手減弱，冷門值博。