丁仔化身拯救專家 28/01/2026 第1場五班1000米，「專家」去季尾轉投丁冠豪馬房後，曾經有數仗交出不俗表現，奈何至今仍未能夠打開勝門，上陣20次僅兩次跑入季席，目前只有18分，若然未能及時反彈會被淘汰。今晚谷戰將除去羊毛面箍及初戴眼罩出賽，丁冠豪早前亦曾安排「專家」試谷閘，直路交出不錯走勢，按住追上以第2名過終點，且看「專家」可唔可以將試閘表現於賽場上展現啦！ 丁冠豪 同場希斯馬房派出「東方魅影」，續由艾道拿主轡，馬匹近績唔錯，季內同程兩戰得1亞1季只係輸頸位，不過排12檔始終有難度，昨晨見騎練都刻意行埋詳談出擊策略，騎者不斷侃侃而談，希斯則低頭細心聆聽，鏡頭吸引。 「專家」月中試谷閘得第2名。