凌登力撐巫顯東 01/02/2026 上季只得4W嘅本地薑巫顯東，估唔到今季過咗一半都未夠，已經有4場頭馬，當然佢今季成績好嘅最大原因係嫡糸坐騎「天將龍駒」先後幫佢贏咗3W，相信只要繼續維持穩定表現，下季仍獲發牌嘅機會相當大。而喺今日沙田賽事，東東就有3匹坐騎，第11場三班1400米嘅「凌登」，上仗在港初出跑同程，沿途包尾落後甚遠，竟然可以喺轉彎掟出大外疊嘅不利處境下，追返一席季軍，走勢徹底露光，今次再攻同程以為會換人，點知繼續以巫顯東掛帥，睇嚟佢有機會繼去年初嘅「荷花之星」後，再次同師傅沈集成合作贏馬。 巫顯東 其實「凌登」繼續重用巫顯東，都唔係冇原因，事關馬主王靜嫻本身係啱啱禮拜三贏馬嘅「佳登」馬主晴朗的心團體經理人，「佳登」上季至今曾經3次由巫顯東執韁，證明同馬主早有默契。 「凌登」上仗初出前嘅晨操都由巫顯東主理，復課後就連踱步都不假手於人，今次再跑1400米仲要孭少2磅，而上仗擊敗佢嘅「一生好彩」增程跑第10場三班1600米，種種有利條件下，「凌登」有力補中。