周俊樂鍊到盡 為博翠兒一笑 04/02/2026 周俊樂最近為一直當佢好似仔咁錫嘅軍機八皇團體成員鍾一帆嘅「會當凌」及「一生好彩」建功，相信鍾生應該非常滿意。而喺今晚跑馬地賽事，周同學又有另一任務，就是要為女友陳翠盈爸爸陳橋森名下嘅「翠兒威威」再下一城。 周俊樂、陳翠盈 現年5歲嘅愛爾蘭自購馬「翠兒威威」，上季喺容天鵬馬房似乎處於適應期，表現唔算突出，但今季加盟巫偉傑馬房後，集中喺谷草1650米攻堅，取得唔錯成績，去年11月初克服不利嘅12檔入Q，剛戰更於此程一放到底開齋，兼且捧走香港會盃，氹到陳橋森非常開心，馬主賽後話愛駒上仗加咗羊毛面箍上陣，可以跑得更集中，而周俊樂嘅留放亦做得好好，沿途冇同馬匹鬥力，發揮出色，佢仲話好欣賞Jerry好勤力，同埋性格比較文靜，而佢亦相信愛駒喺四班應該仲有2至3W喺手。 巫偉傑 既然咁有信心，「翠兒威威」今次再跑四班谷草1650米，仲要抽3檔好位，應該實食無黐牙啦！另外，今晚第7場周俊樂騎嘅「沙井之友」，馬主沙井之友團體成員亦包括陳橋森同埋陳翠盈，如果周同學可以一晚為呢兩隻馬建功，必屬一時佳話。 「翠兒威威」上仗谷草一哩打開勝門。