黃智弘畢業靠3顆心 14/02/2026 將於下周四大年初三賀歲戰停賽缺陣嘅黃智弘，在港已累積67場頭馬，換言之只差3W就升格成為大師傅。近期師傅方嘉柏全力支持呢位徒弟，似乎想佢喺蛇年完結之前助其畢業，近期都畀咗唔少實力馬黃智弘執韁，好似月初嘅「相映紅」，而啱啱禮拜三亦全力出擊，可惜「大千氣象」只得亞軍。 黃智弘 嚟到今日沙田蛇年送歲賽，方嘉柏5匹參戰馬有4駒都係由黃智弘操刀，擺明撐徒弟，其中「大千雄心」、「滿心星」同埋「信心星」，呢3顆「心」都係牌面角色，睇吓黃智弘能否發威中三元，贏夠70場升格？先講吓「大千雄心」，今季演出穩定，6戰都有獎金收，但自從11月尾贏馬後，近兩仗孭重磅只能跑近，所以今次搵黃智弘減5磅可謂係對症下藥；而「滿心星」上仗轉爭泥地1650米姍姍來遲輸畀「皇龍飛將」，今次由受讓14磅變18磅，大有機會反先。 「大千雄心」季內場場都有獎金收。 至於出戰第7場二班1200米草地TVB盃嘅「信心星」，連輸兩場1400米後，今次回師季內贏兩次嘅1200米，有機會恃115輕磅突圍。