友瑩亮馬年新春大吉 22/02/2026 潘頓呢輪氣勢真係比較弱，最近4次賽事只係贏得一隻「加州星馳」，完全係唔合格，啱啱大年初三賀歲戰又食白果，只得3個亞軍。嚟到今日年初六賽事，潘頓手執馬王「嘉應高昇」，應該可以拎到佢馬年首W啩，但如果只得1W都係唔合格，而其餘坐騎中，第6場四班1400米嘅「友瑩亮」應該有機會收復前失啦。 友瑩亮上仗田草1400米得亞軍。 喺啱啱年初三賀歲戰，「友瑩」系已經率先有「友瑩仁」建功，聽馬主友瑩馬主團體經理人楊毅講，佢哋每年都鍾意派馬喺初三上陣，因為想感受一吓農曆新年氣氛，事關可以同啲平時未必入到場嘅朋友一齊嚟，最終「友瑩仁」順利補中。 至於今日出擊嘅「友瑩亮」，就係楊毅同太太胡珮君名下，同樣由伍鵬志訓練，自從上季一出即勝後，一直未能再添戰功，剛戰改用潘頓跑田草1400米，最終不敵質新馬「幸運奇兵」跑第2名，表現不差，今次繼續由潘頓執韁，雖然抽不利嘅11檔，但遇上一組唔算強嘅四班對手，相信潘頓應該可以幫楊生由初三贏到初六。