馬年時來運到 　黎昭昇化身勇士 25/02/2026 季初曾經氣勢唔錯嘅黎昭昇，由去年11月起手風平平，喺今年1月18日憑「冷娃」及「國千金」起孖後，又食咗一個月白果。不過，踏入馬年，呢位現年36歲嘅倉主手風轉順，先喺大年初三憑「快活英雄」拎到在港從練第100W，啱啱禮拜日就輪到「冷娃」順利3連捷。今晚馬年首次跑馬地賽事，黎廐強陣出擊共派8駒上陣，擺明想保持馬年連勝勢頭，力爭3連勝，其中第1場五班1200米嘅「城中勇士」就值得留神。 黎昭昇 6歲愛爾蘭PPG「城中勇士」季初五班谷草1000米跑第5名，賽後卻發現左前腿不良於行後，9月尾由沈集成馬房轉去黎廐，10月再幫此駒一對前球節進行手術，被迫休息一段時間。不過，踏入2026年，「城中勇士」操練工夫漸漸加強，近期先後喺從化及沙田試泥閘，走勢不差，拉士嗰課仲一放到底，今次黎昭昇安排此駒用王牌兼保護權配紀仁安出擊，擺明想轉倉即拚，有望為馬房完成馬年3連捷。 紀仁安 # 「城中勇士」最近試泥閘一放到底。