周俊樂會當凌登頂 01/03/2026 喺啱啱過咗嘅2月份，雖然潘頓上周日田賽試過1日5W，但原來睇番上個月成績最好嘅騎師唔係佢，反而係同得9W嘅艾兆禮同埋周俊樂，依家Jerry更領先何澤堯1場，成為華將一哥，睇嚟今季佢都有機會爭吓「告東尼獎」。 周俊樂 另外，喺啱啱禮拜三為女友爸爸陳橋森嘅「翠兒威威」連贏3場後，周俊樂在港頭馬數字已經去到198場，只差兩場就到200大關，而喺今日沙田賽事，佢騎9駒上陣，不乏爭勝分子，應該有機會完成任務。 巫偉傑 先講吓第6場三班1200米嘅「閃耀天河」，4歲澳洲自購馬來港3戰都係由Jerry執韁，取得1冠1季1殿，剛戰加咗交叉鼻箍立即打開勝門，今次原班人馬再攻同程，即使多孭7磅，但對手唔算太強，有權再下一城。至於第11場二班1400米嘅「會當凌」，呢匹巫廐馬可算係周俊樂今季嘅代表作，5戰得4冠1亞，認真犀利，今次升上二班只負117磅，幕後寧願唔報香港經典盃反而再跑1400米，有啲想捨難取易，希望贏多場先進軍打吡，有權為周俊樂帶來第200場頭馬。 會當凌上仗在周俊樂胯下取得4捷。