楊毅當旺繼續發光 01/03/2026 要數呢輪最旺嘅馬主，「友瑩」系嘅楊毅肯定係其中之一，事關由上個月14日情人節起，先有自己太太胡珮君有份嘅那些年團體名下「暴風一族」爆冷建功，之後兩次賽事就到另一團體馬「友瑩仁」及自己嘅「友瑩亮」輪流贏，真係由蛇年旺到馬年。 馬主楊毅 嚟到今日沙田賽事，就有楊毅同太太胡珮君名下嘅「友瑩光」角逐第10場三班2000米，楊生除咗想愛駒可以幫自己延續旺勢，更重要係全力爭分跑月尾嘅香港打吡大賽。 友瑩光前仗負於錶之宇宙得亞軍，表現出色。 現齡4歲的南非自購馬「友瑩光」來港前4戰取得3冠1季，雖然最長只係贏至1475米，但廖康銘喺來港第2仗已安排此駒增程跑一哩，最終只係輸畀「錶之宇宙」得亞軍，卻可以跑贏今日角逐香港經典盃嘅「幸運派彩」及「紫荊盛勢」，證明有一定能力，點知剛戰扳上1800米入直路無位上，結果表現平平。今次楊生搵到老友潘頓幫手策騎「友瑩光」，擺明係不容有失，埋門亦由潘頓親自跳咗一課，今次轉跑2000米抽4檔好位，潘頓有望可以繼「友瑩亮」後，連續兩次沙田賽事幫楊生建功。