時間寶1檔運都贏埋 11/03/2026 最近有啲馬主頻頻喺凱旋門露面，啱啱禮拜日田戰，王明澤同王經緯兩父子憑「時時歡欣」及「時時歡聲」建功，而蕭氏家族一眾成員好似蕭劍新及蕭百君等最近手風亦順。至於另一位近期頻頻拉頭馬嘅馬主，就係「時間寶」嘅鄧明及佢啲家人，「時間寶」上月中取得加盟姚廐後首W，上個月情人節嗰日就輪到鄧生有份嘅紅駿團體名下賽駒「自動自覺」爆出35倍冷W，啱啱禮拜日就係佢同家人夾份嘅「日出東方」在港第3次出賽就建功。 馬主鄧明 而喺今晚跑馬地賽事，鄧明又有機會憑「時間寶」連續兩期拉頭馬，雖然此匹姚廐馬今次升上四班，但姚本輝都講過呢隻馬現時跑1200米唔夠快，反而一哩更合發揮，同埋改用開縫眼罩後幫助極大，相信返回四班仲有競爭力，而今次除咗孭少13磅，更重要係抽到1檔好位，真係運都贏埋，話唔定好似上仗咁一放到底。 「時間寶」上仗快放贏谷草一哩