全華班組合連掃3W 翠兒威威樂巫窮 18/03/2026 嚟緊禮拜日嘅香港打吡大賽，唔少人都關注兩對華人組合，包括丁冠豪、何澤堯嘅「小鳥天堂」同埋羅富全、梁家俊嘅「數字天文」。 周俊樂 不過，除咗佢哋之外，仲有第3對華人騎練組合嘅打吡賽駒不能忽視，就係巫偉傑同埋周俊樂嘅「會當凌」，話晒呢匹4歲馬今季6戰5勝，即使由1400米大幅增程跑2000米，但過往嘅「平海福星」都係由1400米跳程贏埋打吡，「會當凌」唔係冇機會照辦煮碗。 巫偉傑 喺打吡大賽前，巫偉傑同周俊樂喺今晚仲有另一任務，就係為Jerry女友爸爸陳橋森嘅「翠兒威威」力爭4連捷。呢匹前容廐馬今季加盟巫廐後大幅進步，最近更喺四班谷草1650米連贏3場，陳橋森講愛駒係愛爾蘭馬，依家5歲終於踏入大熟期，演出仗比仗好，佢亦感激巫偉傑嘅悉心訓練及周俊樂嘅出色發揮。雖然「翠兒威威」上賽勝後加7分升上三班，但最重要係周俊樂今次仲可以超2磅為此駒效力，擺明有心攻堅，值得重視。 「翠兒威威」連贏3場谷草一哩。