時時歡聲不叫停 22/03/2026 最近啲大馬主似乎都好鍾意食尾胡，好似「美麗」系嘅郭少明對上兩次賽事分別憑「一世美麗」同埋「爆得美麗」贏尾場賽事。 王經緯 嚟到今日沙田打吡大賽日，或者輪到「時時」系嘅王明澤繼今個月8日憑「時時歡聲」食尾胡後，再度憑愛駒攞尾彩。 「時時歡聲」上季尾以3歲英國自購馬身份已經贏到三班1400米，自然令人寄望甚殷，可惜竟然要抖咗10個月先再次上陣，結果久休都冇影響馬匹表現，上仗今個月初照贏三班1400米兼殺低「綠野飛馳」，盡顯能耐。馬主王明澤囝囝王經緯講，舊年5月收到告東尼嘅電話，話「時時歡聲」喺馬格入面整親自己，本身預計唔使抖咁耐，可惜康復進度比較反覆，最終足足抖咗10個月先可以上陣，而佢覺得愛駒上仗賽前試閘走勢都唔錯，加埋鞍上人巴度控制步速得宜，順利取得跨季連捷，而王生亦講明雖然佢哋冇幫呢匹4歲馬報跑打吡，但一直計劃喺今日上陣，即使升上二班，一樣有能力取得3連捷。