紫荊戰士枕戈待發 29/03/2026 雖然喺啱啱嘅香港打吡大賽，雙龍出海嘅「紫荊」系最終無功而還，但「紫荊盛勢」同埋「紫荊傳令」分別取得第3及5名，均有獎金收，對馬主陳李妮同陳國泰嚟講，應該收貨，況且上周日佢哋都有「紫荊拼搏」爆出15倍冷W，都叫做可以喺打吡賽日拉頭馬。 紫荊戰士多次試閘循序漸進。 整體嚟講，「紫荊」系今季成績唔差，「紫荊盛勢」即使失落打吡，都贏咗兩W及攻下香港經典盃，而「紫荊拼搏」亦有1W在手，而「紫荊傳令」都試過跑第2名，而喺今日沙田賽事，輪到L布PPG「紫荊戰士」首度登場，角逐第6場四班1400米中大校友會聯會盃，睇吓能否一鳴驚人？ 「紫荊戰士」最近一直由深得「紫荊」系重用嘅班德禮考驗，加埋試咗6課大閘先上陣，擺明唔好唔出，無疑初出跑1400米有啲難度，但在港同父廐侶「中國心」可以跑長途，而且全兄弟馬「錶之宇宙」啱啱喺打吡跑第4名，長力應該唔使懷疑，睇吓能否為「紫荊」系連續兩次日賽拉頭馬啦？