告東尼爆發1600W 01/04/2026 騎而優則練嘅香港馬壇大哥大告東尼，雖然啱啱禮拜日沙田賽事派7駒全軍覆沒，但整體嚟講呢輪成績都唔錯，而喺今晚沙田全泥宴，東廐派6駒上陣，先後搵咗艾兆禮、布文、潘頓等高手助陣，擺明要增添進帳，更有機會邁向練馬生涯新里程，事關佢在港已累積1,598場頭馬，仲差兩場就夠1,600場，單睇佢今期陣容，有機會完成目標。 「爆熱」（左）最近試泥閘首名衝線。 先講吓第1場五班1200米嘅「爆熱」，呢匹名氣極響嘅法國自購馬，今季加盟東廐後喺五班起步，兩度於泥地跑近，反而喺草地就無段好睇，確認係泥優於草，上仗田草1200米大敗後，復課操練積極，埋門改用艾兆禮贏泥閘，今次立即以呢位意大利好手掛帥，肯定想贏馬交代。 第5場四班1800米嘅「加州星馳」亦係泥地專家，近3仗由潘頓接手取得冠亞季各一，可惜跑法始終比較被動，上仗後上不及，今次增程跑1800米應該更合腳法，睇吓最終係咪由「加州」系綵衣幫告東尼贏夠1,600W啦？