天天耍樂減磅搏殺 01/04/2026 資深馬主蘇啟聲都算係羅富全嘅最大支持者，事關佢名下4匹現役馬悉數擺喺羅廐，而全哥亦好畀心機，啱啱禮拜日終於為蘇生名下嘅「天天更好」敲響勝鼓後，今期沙田泥地夜賽輪到佢另一匹愛駒「天天耍樂」出擊，角逐第7場四班1200米，兼且立心搵首度登場嘅女見習生袁幸堯減10磅上陣搏殺，睇嚟蘇生有機會連續兩期拉頭馬啦。 羅富全 5歲PPG「天天耍樂」已證明泥地性能不俗，今季首戰強配潘頓跑四班泥地1200米險勝「開心五月」後，升上三班都試過入圍，但其後明顯未能威脅對手，全哥亦立心讓馬兒轉爭草地減分，到上月初落到四班重配潘頓跑首本泥地1200米搏殺，點知因為氣管有血導致演出失準。 「天天耍樂」季初贏泥地短途姿態輕鬆。 不過，輸完一仗後，「天天耍樂」操練如常，狀態對辦，今次改用袁幸堯比上仗孭少13磅，着數到暈，有望換人即變身。