鍾易禮錦上添花 06/04/2026 啱啱上個禮拜三沙田泥地夜賽，告東尼起孖兼取得在港第1,600W，作為徒弟嘅鍾易禮（Angus）雖然無份幫手建功，但Angus最近靠晒師傅食胡，事關對上3場頭馬都係出自東廐。而喺今日沙田賽事，佢只得4匹坐騎，卻有機會夥拍近況出色嘅「桃花開」角逐第9場二級賽1600米主席錦標，有望為佢帶嚟出道至今首場分級賽勝仗。 「桃花開」（近鏡）最近配鍾易禮連下兩城。 身價高昂嘅「桃花開」，馬主桃花團體嘅曾祥顯引入後一心吼實去年嘅4歲馬大賽，可惜馬匹上季進度欠佳表現平平。不過，今年轉5歲後，「桃花開」漸漸回復水準，近兩仗喺鍾易禮胯下全勝，表現不斷進步，曾生都話本身係想「桃花開」爭打吡，可惜當時愛駒未夠火候，今季馬匹狀態好咗唔少，最終連贏兩場，而曾生都想愛駒可以進軍分級賽，難怪今場揀跑主席錦標。另外，曾生亦大讚鍾易禮，事關「桃花開」同騎者特別夾，人馬合作3次得2冠1季，佢仲話鍾易禮細自己一年，好熱誠兼年輕有為，希望今次攜手一齊贏二級賽啦！ 鍾易禮