袁幸堯極速上位 06/04/2026 啱啱出道嘅女見習生袁幸堯，上周三沙田泥地夜賽地標戰一鳴驚人，憑葉楚航嘅「偵探傳奇」拎到在港首場頭馬，全晚取得1冠2季1殿，成績都算幾標青，唯一可惜就係仲未同師傅姚本輝合作贏馬。而喺今日田草賽事，袁幸堯有7匹坐騎，輝哥畀咗兩匹初出馬「極速神影」同埋「利高八斗」交畀徒弟執韁，兩駒都係做足工夫而臨，絕對不能忽視。 袁幸堯 「極速神影」馬主之一就係武打巨星甄子丹，早排佢就以打吡大使身份入場，今日佢就有機會以馬主身份再嚟沙田馬場拉頭馬，佢對上一匹愛駒「宇宙車神」當年來港第2仗就贏馬，咁啱都係田草1000米直路賽，而「極速神影」初出跑四班同程用袁幸堯減磅，唔排除立即有驚喜演出。 睇番備戰，「極速神影」呢匹3歲PPG喺今年1月尾先試首課大閘，其後再試多4課閘，最近兩次都係由袁幸堯親自考驗，前一課1200米泥閘展現唔錯前速，拉士先畀「超開心」趕過跑第2名，至於上月尾一課1000米田草閘，即使包尾而回，但同組係兩匹高分馬「嘉應高昇」同「美麗第一」，而「極速神影」只係按韁無騎過，相信已經做夠工夫，今次跑直路賽抽到13檔好位，絕對有權一鳴驚人。