堅先生桂福特食住上 06/04/2026 今季來港開倉嘅南非練馬師桂福特，初期真係可以用兵微將寡嚟形容，但佢都算迅速打響名堂，唔少原本毫無表現嘅賽駒，加盟桂廐後都有脫胎換骨演出，季初更憑「安遇」贏咗場G3婦女銀袋，自然吸引更多支持，佢依家亦變成逾70駒嘅大倉。 桂福特 不過，除咗成功令一批舊馬變身，作為一個新倉主，最重要喺質新馬交到貨，最近就有「堅先生」一出即勝，今日「堅先生」再爭第5場四班1200米，梗係想再下一城。 堅先生上仗在港一出即勝。 聽「先生」系話事人史立德講番，原來桂福特開倉就主動同佢尋求合作機會，自己亦欣然答應，而桂福特就畀咗3隻馬佢揀，佢就覺得「堅先生」夠大隻，同埋肌肉線條犀利，就決定揀呢隻，而桂福特都話如果畀佢自己揀都係揀「堅先生」，最後愛駒一出即勝，證明眼光唔差。另外，史生覺得「堅先生」上仗直路走馬林都有啲擔心，卻能穿插上前，追勢吸引，相信馬匹鬥心唔錯，今次再跑田草1200米，睇吓能否克服重磅順利連捷啦？