楊明綸慶生龍之悅 12/04/2026 雖然同梁家俊、何澤堯、周俊樂同埋潘明輝比較，同屬本地薑嘅楊明綸成績冇咁標青，但經歷過19至21年連續兩季只得單位數頭馬後，近季佢嘅表現開始穩定，上季亦有20W。到咗今季，仲有3個月左右先煞科，阿綸已經有16W喺手，有機會突破上季頭馬數字。 楊明綸 咁啱剛周五就係楊明綸38歲牛一，今日沙田賽事佢難得有9匹坐騎，兼且有唔少嫡系實力坐騎包括「魅力知耀」、「心雄雄」同埋「興馳千里」，但係除咗呢3駒，出戰第5場四班1200米嘅「龍之悅」亦有機會成為佢嘅賀壽馬，幫佢補祝生日。 「龍之悅」上仗初出即勝。 3歲新西蘭PPG「龍之悅」，上仗初出賽前試閘走勢唔算太吸引，因此臨場冷至23倍，但呢隻馬沿途走勢理想，拉士走外疊一衝過晒，擊敗另一匹大冷門「杭至尊」，造1分9秒04唔算慢，事關比同日另一場四班1200米頭馬「堅先生」快4線。復課後「龍之悅」繼續積極打磨，埋門喺從化試泥閘前後兼備，今次再跑同程唔使孭135磅，應該有一定幫助，有望順利連捷兼幫楊明綸慶生。