極光之子周俊樂賀壽 15/04/2026 今季由季初遠征南韓拎到1冠1亞，旺到依家嘅本地薑周俊樂，暫時已經有34場頭馬，拋離何澤堯6W，只要繼續保持住呢個氣勢，話唔定可以首次奪得「告東尼獎」。 「極光之子」最近試泥閘第5名有進步。 不過，原來唔講唔知，周同學已連續3次賽事無進帳，而咁啱聽日就係佢26歲牛一，相信Jerry都好想用頭馬幫自己提早慶祝，兼且中止連敗紀錄。 無疑單睇今晚周俊樂6匹坐騎，牌面真係唔算太強，但角逐第5場三班1650米香港欖球總會盃嘅「極光之子」，上仗初跑谷草1800米走勢唔差，末段狂追只係輸畀「快路」、「中國心」及「瑪瑙」得第4名，證明可以應付跑馬地，今次續配周俊樂，自然令人憧憬。此駒在港頭兩仗跑2000米，上仗亦跑1800米，今次再縮程跑一哩究竟啱唔啱？原來呢匹愛爾蘭自購馬來港前最長只係跑過1600米，兼且贏過1次，話唔定一哩先係佢最強路程，睇吓能否幫周俊樂贏馬捧盃兼賀壽啦？