支付之父即時到帳 19/04/2026 今日第3場四班1000米草地直路賽，有兩駒首度登場，來自葉楚航馬房3歲PPG「支付之父」，馬名相當特別，難免令人覺得係咪同坊間其中一個最多人用嘅支付程式有關，但原來馬主勞俊傑真係同電子支付有密切關係。現時電子支付終端方案公司俊盟國際主席兼行政總裁勞俊傑，原來自從90年代已經識得編寫信用卡嘅刷卡功能，甚至研發全港首張Visa payWave感應式信用卡，之後開始創業時一度受到挫折，但目前已成為提供電子支付終端機支援服務嘅其中一間主要公司，難怪依家榮升馬主後，首匹愛駒就改做「支付之父」。 葉楚航 至於呢匹「支付之父」雖然喺去年10月左前腿肱骨受傷，被迫抖咗一輪，但近期操練甚理想，3課大閘走勢都唔差，而葉楚航講過馬房下半季都係靠啲質新馬食胡，睇吓今次呢匹「支付之父」能否繼「通情達理」後，成為另一匹一出即勝嘅葉廐PPG，同時為航哥贏夠16W畢業啦！