風繼續吹真金烈火 19/04/2026 曾經喺英國做過當地全天候賽事冠軍騎師嘅金誠剛，的確喺泥地賽事特別醒神，上季試過喺沙田全泥宴連中三元，而喺今個月初嘅泥地夜賽，佢全晚騎3駒亦得2冠1亞，認真犀利。到咗今日沙田泥草混合賽，佢喺5場泥地賽事悉數有坐騎，就知喺其他練馬師心目中，都覺得佢係泥地專家，而喺呢5匹坐騎中，角逐第6場四班1650米泥地嘅「風繼續吹」，有機會為佢再次帶嚟頭馬。 風繼續吹上仗贏馬意義重大。 雖然已經7歲，但「風繼續吹」戰鬥力仍未退化，今季更先後取得2W，剛戰初配金誠剛一拍即合，兼且當晚係張國榮逝世紀念日，對一向喜歡以哥哥名曲幫愛駒命名嘅馬主那些年團體一眾成員嚟講，自然意義重大。馬主成員之一嘅陳偉健都話佢哋一眾成員都都好鍾意張國榮嘅歌曲，亦有用其他歌名改馬名，希望繼續將呢個經典傳承落嚟，而佢亦大讚金誠剛上仗初策發揮出色，難怪原班人馬再攻泥地1650米，有力再下一城。