黃智弘珍惜太行美景 22/04/2026 以前成日話啲見習生畢業即失業，因為減磅優勢少咗，影響支持導致成績下降，但睇番近年嘅周俊樂、鍾易禮同埋潘明輝，無疑畢業後都要啲時間調整，但依家都算企穩陣腳。至於今年2月尾贏夠70場升格做大師傅嘅黃智弘，就真係有啲唔好彩，事關佢畢業後無幾耐，師傅方嘉柏就搵咗莫雷拉返嚟做馬房主帥爭冠軍，難免令黃智弘失去大部分柏廐支持，去到依家都未能拎到升格後首W，真係有啲濕滯。不過，喺今晚跑馬地賽，即使黃智弘依然無柏廐馬跑，但仍有5匹坐騎，並得到沈集成支持，將兩匹上仗喺佢胯下跑近嘅「太行美景」及「皇者有利」繼續原班人馬出戰，智弘真係要好好把握。 黃智弘 第1場五班1200米嘅「太行美景」，上周三喺五班谷草1000米後上不及得殿軍，落後廐侶「喆喆友福」兩乘許，應該屬副車性質，今次匆匆再出增程跑1200米，肯定更合腳法，即使檔位唔算太好，睇吓能否後上補中，為鞍上人帶來做咗大師傅首場勝仗。