飛雲黃智弘爭口氣 03/05/2026 方嘉柏主帥莫雷拉啱啱禮拜三谷戰起請假兩期，季初幫師傅立下不少汗馬功勞嘅徒弟黃智弘，真係多咗唔少機會，可惜剛周三騎3隻輸晒，最慘嘅尾場「相映紅」早段阻到人犯規，由於係季內第6次不小心策騎，結果重罰停賽3日兼罰款兩萬，認真慘情。莫雷拉將於周三沙田全泥宴就會回防，肯定對黃智弘構成影響，而佢今次繼續獲方嘉柏支持騎4騎，相信佢一定會把握機會爭氣，兼且仲要幫師傅爭番榜首，當中以第1場五班1200米嘅「飛雲」最值得重視。 黃智弦 「飛雲」今季先後試過由巴度、潘大衞同埋莫雷拉執韁，但都係贏唔到，反而同黃智弘最夾，季內唯一頭馬正正由佢建功，因此今次雷神請假，搵番黃智弘操刀都好合理，兼且比上仗孭少6磅，喺五班應該有優勢。值得一提，「飛雲」馬主馮柏基嘅太太兼前新聞主播黃婉曼名下嘅「觀眾之力」喺上個月19日終於打開勝門，睇吓今日係咪輪到「飛雲」再添戰功？ 飛雲季初泥地由黃智弘開齋。